Tuku Rākau – te reo

English

Kei te whenua i waenganui i ngā Huarahi o Greenway me Puriri. I tēnei wa, kāore e wātea tēnei wāhi ki te hunga tūmutanui.

Ko tēnei wāhi te wāhi pokapū mō Te Āti Awa ki Waikanae atu i 1849 ki 1886, ki te wā i hūnuku atu tōna iwi ki tētehi wāhi e pātata ana ki te rerewhenua hou.

Te tūnga o Tuku Rākau

1848

E 600 tāngata o Te Āti Awa i ārahina e tō rātou rangatira, e Wiremu Kingi Te Rangitake mai i Kapiti, hoki rawa atu ki tō rātou whenua tupu ki Taranaki. He mea tūkino ngā kāinga i mahue i a rātou e te rū i 1848, e te auraratanga hoki o te one.

1849-86

I runga i te akiaki a te kāwanatanga, ko te nuinga o Te Āti Awa i mahue iho, i hūnuku atu ki Tuku Rākau, he wāhi taumarumaru, haumako hoki kei te raki noa o Kaiwarehou, ā, he wāhi whakawhiti i te awa o Waikanae. 

He mea ārahi rātou e Wī Tako Ngātata-i-te-rangi, ā, he mea whakatū he kāinga, he māra, he wharenui, arā ko  Puku Mahi Tamariki.  Ko te whakaaro ia kia wātea te wharenui hei whare rūnanga mō te Kīngitanga.

I 1877 i hangaia tētehi whare karakia i Tuku Rākau.  I kuorotia he wīti i tētehi mira i te taha o te awa o Waimeha.  He hipi rāhui nunui hoki i whakatupungia.  Kei runga tāhuna te urupā Takamore, kei te hauāuru o tēnei wāhi.

He kaipupuri whenua nunui a Wī Parata i runga Kapiti me tuawhenua. Ko ia te mema Māori o te Hauāuru ki paremata i 1871-77.  Ko te rākau kauri nui i te hauāuru o tēnei tohu whakamahara he mea tupu i te taha o tōna whare.

1873

E 29,500 eka o te Poraka Ngarara i tukuna e te Kōti Whenua Māori ki tētehi wehenga o Te Āti Awa nā rātou i pupuri hei whenua ā-iwi.

Te nuku atu ki te rerewhenua

1881

He mea hoko e te Karauna he whenua tūpoupou 15,500 eka i te take puke o Tararua ka hoatu ai ki te Kamupene Rerewhenua o Pōneke me Manawatū hei wāhi utu mō te hanga i te rerewhenua.

1884

I tētehi hui i te marae o Tuku Rākau, i hui tahi te tira āpiha rerewhenua me te tangata whenua nāna rā i whakaae kia tukua he whenua hei whakatupu i te rerewhenua i runga i te tikanga ka tū ngā tereina katoa ki Waikanae.  I te whakatūwheratanga o te raina hei ara haereere mō te tangata i 1886, i tōia te wharenui o Whakarongotai ki te wāhi e tū nei ia ināianei i Marae Lane.

1891

He mea wehewehe te Poraka Ngarara e te Kōti Whenua Māori kia riro takitahi atu ki ngā kaipupuri Māori, nā konā i wātea ai ki te hoko atu i tō rātou ake wāhi whenua.

1895

Nā te tīma okiha i tō te whare karakia mai i Tuku Rākau ki te tiriti o Elizabeth, arā, ki te tāone i mōhiotia i taua wā ko Parata.  Nā, kua tū hei whare matua mō te whare karakia o Hato Ruka.

1906

I muri mai i te matenga o Wī Parata, i hokongia atu te nuinga o te whenua nō te Māori i te taha hauāuru o te raina rerewhenua.  I 1911 i nohongia te whenua nei e te whānau Greenaway, ā, i pāmungia, heke iho, heke iho ōna ngā whakatupuranga.

1961

He mea hoko e Waikanae Christian Holiday Park Inc. (El Rancho) he whenua i te whānau Weggery nā rātou nei te whenua i mahi pāmu mo te 20 tau neke atu.  He whare hararei whānui tonu, ā roto, ā waho e whakahaeretia ana i konei ināianei.